ضاقت حدودها

ضاقت حدودها .. ضاقت حدودها
واتخنقنا واستوينا واتهرينا
ومش قادرين نفلفص ...

ضاقت حدودها
وبقينا زى التراب رخيص
والدود المعفن عمال
ياكل فى لحمنا ويمصمص
ضاقت حدودها
واستحكمت حلقاتها
اللى كانت وسعة وبرحة
وتساع قدنا ملايين
من غير ما ترفس

ضاقت حدودها
واتشقلبت احوالها
ومشيت فى رجالتها الفرة
وبقوا زى الفراخ .. بتعطس
وتفضل تعطس وتعطس
وقبل ما تنزل السكينة
بتفطس
واللى بده يعيش وسطهم
حتما ولابد
ريشه نقصقص

ضاقت حدودها
واتسممت اجوائها
واتسرطنت احشائها
والبركة فى اهلها
عمالة تنقص وتنقص

ضاقت حدودها
واتمرمغت سمعتها
وضاع شرفها
وسط اللى كانوا قبلها بكتير
وهى زى البهيمة ..بترفس
وترفض اى صوت
يتبح فى نداها
ويعشق هوها
ويرفض يساوم ..او يدنس
او يدلس او يغطرس
او يبقى اخرس
ضاقت حدودها
ودابت حبالها
وتاهت خطاها
وسط الطريق اللة كان منور
بس الكهربا مسكتها
وسابت طريقها
ان شاالله يتباع
او حتى يتخصص

ضاقت حدودها
فى نوبة طوارىء
عايزة تتطرمخ
على المفاسد
والمساخر والمهازل
غاوية تسلسل
ناوية تسحل قلب شاعر
او تزلزل نبض حاسس
كل صوت ينحشر جوه الحناجر
وكل رافض موت ينتهى وسط المقابر
عايزة كل النبض ..يخلص

ضاقت حدودها
ايوة ضاقت
لما هانت
والظلم ما تعدش
والقهر ما تدقش
عارف شكلها بقى ايه
علبة السلامون .. معفن
وريحته فاحت
زى بالضبط عبارة
من غير قبطان
او هربان
وسابعا تغرق فى عرض البحر
اصوات غلابة بتعوى
والسمك كلنا وشبع
حد نفسه يمصمص

ضاقت حدودها
رغم انها
كان اسمها
فوق التاريخ .. فوق الحضارة
فوق العبارة والشيكارة
واهلها بقوا زيها
قراطيس متقرطسة
اجدع واشيك قرطسة
بحس على يقولوا
بقينا عالة
فوق القولة
غاويين بطالة
شاربين مرارة
طافحين برود
حد عاوز يبعبص

ضاقت حدودها
ضاقت حدودها
مش ناقصه غيره
هو وعياله
وكمان مدامه
وشوية حثاله
يقولوا عنها
بتاعتنا احنا
واللى مش عاجبه
يمشى
او يستنى دوره
ويعرى طيزه.. ويلحس
ضاقت حدودها

خمسة وخميسة

-1-
ربع جنيه مخروم ,
وشوية فكة فى جيبك ,
تساوى ايه الدنيا ؟
ما تشيلش الهم .
هاتقوم

-2-
ايه فى الدنيا يقرف ؟
ايه فيه يكئب ؟
داهية لتكون مبسوط ,
مصيبة تكون مرتاح ,
هم يضحك

-3-
مين عاش قبلى ؟
عشان اساله ,
ليه ما متش؟
قبل ما اساله
ازاى عاش ؟

-4-
من خرم الباب
هاتشوف احسن
وتعرف اكتر ,
بس لو اتفتح الباب
هاتشتاق للخرم ,

-5-
شرنقة ورا شرنقة
محبوس يا ولداه ,
عيط وقول طلعونى
محدش هايرد
يبقى تسكت احسن ,
-6-
مهما تشرق او تغرب
بكرة هاترجع تانى ,
مليان بنفس الحسرة ,
ونفس الصوت المخنوق ,
وتقول هاتفرج

-7-
مخضوض من ايه بالظبط ؟
ملامحك هى ملامحك ,
وقرفك نفس قرفك .
مفيش حاجة اتغيرت
غير الارض اللى تحتك ,

-8-
سكينة حامية وسرقانى ,
من نفسى باهرب وباعانى ,
وكل ما شاتاق لبكرة
يغيب عنى ويعاند
عايزنى اطلع لسانى ,

-9-
عايش ولا بتحاول ؟
حقك عليا المرة دى
نسيت قبل ما اسالك
اقولك
انت موجود اصلا؟

-10-
ياما كان نفسى
انام واروح فى النوم ,
واقسم مع الملايكة
حلة رز بلبن
بس الملايكة صامت ,


-11-
بدى اشتهى مرة
او حتى مرتين
بس خايف قوى ,
لتروح شهوتى ,
مرتين

-12-
عيب عليك يا عم
كفاية شيل الهم
هو انت غاوى قرف
وبتموت فى الغم
حاجة تخنق .

-13-
عايز تقول ايه ؟
اخرس .. اوعى تنطق
عارف بتكلم مين
ولا ناسى
انك اخرس ,

يعنى اهى محاولة !!

من زمن ممكن تقول كبير ما ضيفتش اى حاجة على البلوج .. يمكن اكون انشغلت او بعدت او نسيت نفسى شوية فى تفاصيل كتيرة ويمكن يكون السبب انى قررت اكتر من مرة اضيف بس مش عارف اقول ايه ساعتها باحاول ادور جوايا على حاجات كتبتها من زمان بس باحس انها ممكن تكون قديمة شوية باخلص من كل ده وافضل اتفرج على البلوجات التانية الهايلة جدا اللى ناسها مستمرين دون انقطاع طويل زى حالتى .. لما باقرا واعرف واتاثر واعيش جوه البلوجات ساعات كتيرة باحس انى ما عنديش حاجة تتقال يعنى حالة بيعديها اى واحد انفصل شوية عن حاجات بيحبها .. المهم انى قررت اخلص من ده كله وارجع اكتب تانى حتى لو احساسى فى اللحظة دى .. الصراحة كمان الحكاية ما عدتش تشجع اى حد انه يكتب اى حاجة ممكن يصرخ بس هايصرخ على ايه ولا ايه السعار الجنسى اللى فى وسط البلد فى العيد ولا الريس مانجة اللى خلاص ممكن تقول انه اتحكم فى كل صغيرة وكبيرة فى البلد وعايش حياته .. حاجات كتيرة وعجيبة وغريبة تستاهل ان الواحد يكتب عنها .. هاحاول امسك قلمة او حتى الكيبورد وارجع اكتب تانى ان شاءالله حتى لنفسى

كل شيىء انكشفن وبان

-1-
بارسم قلوب كبيرة

مش وسطها قلبى
باحلم لناس كتيرة
وحلمى مستخبى .
مكتوب عليا استوى

وانا لسه باحبى .
كل الحاجات عارفها

عمال ألم واعبى .
حاجة واحدة غايبة عنى

انا اسمى ايه ..يا ربى ؟!!

-2-

كل ما اقعد على كرسى

واحد يخبطنى ويعدى .
وكل ما اركب عربية

اشارة غلسة تقول هدى .
وكل ما ارسم امنية

اكبر قلم يلقاه خدى
طول عمرى باحفظ اغنية
الدنيا غدارة يا افندى

ساعات تلاقى فى خمارة

بركة دموع وقصص هندى
وساعات تقابل فى جنازة

مجنون بيضحك ويعدى
-3-

حفظت كتير معانى
لسه معنى واحد

قابلت ياما ناس

الصادق بس واحد

عملت كتير بلاوى

خدعت الف واحد
صاحبت عيون كتيرة

جواها حلم واحد

وفى ليلة ضلمة عتمة

مفيهاش نجم واحد

ما شفتش اى حاجة

ولقيت قدامى واحد

بقولى يا بينا

قلت مستنى واحد

خدنى غصب عنى

والطريق قدامى واحد

حسيت جوايا حاجة

رسالة فى معنى واحد

الدنيا ايه تساوى ...؟
!!قدام رب واحد

لوحة شطرنج وعبيط بيلاعب نفسه !!

حظك اليوم .......قدامك 3 مسيرات ...واحدة حمرا وواحدة خضرة وواحدة سودة ...انت رايح فين ؟؟

هى مصر بلدنا رايحة على فين بالظبط؟ السؤال ده بيدور فى ذهنى من فترة طويلة ...كل ما اتأمل فى الحاجات والمصايب اللى بتحصل حواليه ..ساعات بتبقى احداث كتيرة وساعات تصرفات بشرية وسلوكيات افراد ...بس الصراحة كل مرة كنت باتعب وباحاول انشغل عن السؤال ده واقول لنفسى انت عايز ايه مش خلاص انت فهمت الفولة وعرفت الحكاية من ساسها لراسها مش مهم التفاصيل كبر دماغك ...يعنى محاولة لارضاء الذات واهو الواحد متخيل انه عارف حاجات كتيرة سمع كلمتين من هنا على كلمتين من هناك من ناس فاهمة وواعية وحلل مع نفسة شويتين وقرا له شوية سطور مجنونة لناس زيه متخيلين انهم فهموا الفولة برضه ولعبت بيهم الثقة وحبوا يعرفوا الناس اللى مش فاهمة ايه هو اللى مش فاهمينه ....


بس الصراحة للاسف الشديد لا انا ولاهما فاهمين اى حاجة ....يمكن كل واحد فينا عرف شوية وأمن ان البلد دى بقت عاملة بالظبط زى لوحة الشطرنج اللى بيلعب عليها واحد عبيط بيلاعب نفسه ومصمم انه يكسب من غير ما يموت الملك !!!لكن اللوحة دى لسه فيها مربعات كتيرة جدا مش واضحة ومش معروفة وغبى جدا اللى يقول انه هو الوحيد اللى قادر يفك شفرتها حتى لو كان دافنشى نفسه ابو الشفرات كلها او حتى ان كان صاحب شركة ناسيت ولا لورد برضه يبقى غبى !!

ارجع تانى للسؤال الاولانى المهم ....البلد دى رايحة على فين ؟ المناسبة المرة دى تلات مناسبات مرة واحدة ..3 مسيرات لو عايز الدقة مسيرة خضرة ومسيرة حمرا والتالته لامؤاخذة سوده !! شفتهم بعينى طالعين من حتة واحدة بس كل واحدة فيهم واخدة طريق مختلف ...كل اللى ماشين فى التلات مسيرات طلعوا بمزاجهم وكل واحد فيهم اختار مسيرته بنفسه احنا فى عصر الحرية زى ما كلنا عارفين يدوب خد قراره وهوب حط نفسه وسط المسيرة اللى اختارها من غير ما ياخد اذن من حد .....
-1-
نبدا بالمسيرة الخضرا ....عارفين طبعا الدنمارك وعارفين اللى عملته الدنمارك يا نهار اسود على الجرأة والوقاحة وعمى الالوان اللى الماس دى فيه ايه الفجر ده حد عاقل يعمل كده ؟ يحط نفسه قدام مليار بنى ادم ؟ مش عارف بالظيط الجورنال اللى نسر الكاريكاتير المسيىء للنبى محمد "عليه الصلاة والسلام " كسب قد ايه من ورا العملة السودة دى بس الاكيد ان الدنمارك هاتلعن اليوم اللى طلعت فيه اول جورنال وهاتندم كتير قوى ان عندها جرايد من اصله !! نرجع للمسيرة اللى كانت غضبانة وثايرة بس خسارة ركب موجتها اصحاب الوشوش الكالحة سبوبة وجت لحد عندهم عشان يحاولوا يغسلوا وشوشهم شوية قدام الناس ...هوب تلاقى رؤساء الجامعة والوكلا والعمدا والدكاترة متقدمين الطلبة ورافعين بنفسهم اليفط فى المظاهرات وبالمرة شيخ الازهر والمفتى ووزير الاوقاف يركبوا مظاهرة جامعة الازهر وانتى كخة يا دنمارك وبالروح والدم هانجيب اليورو الارض !!ولو سالت الناس دى الجراة جت لها ازاى عشان تخرج فى مظاهرة اقولك انهم اكيد خدوا اذن العبيط اللى بيلاعب نفسة شطرنج او كانوا متاكدين ان خروجهم مش هايضايقه وممكن كمان يفرحه !!
-2-
المسيرة التانية ....الحمرا ... دى بقة كانت مسيرة كلها حاجات تفتح النفس اعلام مصر وزينة وكلاكسات واعلانات فى الشوارع واغانى حماسية من عينة انت مصرى ابن مصرى ابن ستين.... والمناسبة كانت " كأس المزز الافريقية " اه مزز امال دول ايه اللى كانوا فى المدرجات انت ما بتشفش جرايد ولا تليفزيون ولا الاسبان اللى كانوا بيزيعوا البطولة ويخرجوها بدل مخرجين التليفزيون بتاع الريالة كانوا جايبين معاهم المزز دى كلها من اسبانيا عشان الصورة تتطلع حلوة ....لا ياعم الجمهور ده مصرى ابن مصرى بس جمهور : نيولوك ...يعنى بعد ما الكورة كانت افيون الغلابة وبتوع الترسو والتذكرة ام اتنين جنيه والصحافة فين التعريص اهو !! دلوقتىبقت بتاعة ميزو وهايدى ونونا ونيرفانا وبرانيط ووشوش ملونة وشفايف وشعور وحاجات كده من اللى قلبك يحبها والغربية ان كلهم بيقولو مصر ! تخيل المسيرة الحمرا تقريبا انطلقت من شارع الحمرا الشهير فى لبنان وناوية تدهن البلد بلون جديد ....

-3-

المسيرة التالتة : السودة بعيد عنكوا كانت رايحة سفاجا اصل بلدنا طول عمرها وهى بتغسل شعرها ع الترعة غاوية ارقام قياسية وكلها انجازات تارخية ...المرة دى مصر دخلت التاريخ من اوسع ابوابه ..وزى ما احنا اكتر ناس فى الدنيا عندهم اثار وعلما طفشانين وموظفين مرتشين وفشل كلوى وبطالة مقنعة وفلوس متهربة واعضاء برلمان نصابين وقوادين ووزرا فاسدين وكمان قرايب بعض وصحفين ما يعرفوش غير عاش بطيخ مولانا وفلاحين باعوا الارض وسهرانين قدام الدش والوصلة اللى بتجيب ايه ار تى ومشاريع وهمية زى توشكا وبوشكا ونوشكا وفيفى ...المرة دى احنا برضه اللى بنافس " تايتنك " اه وعزة جلال الله ...اكبر كوارث السفن فى التاريخ المصريين بلا فخر بيقربوا جدا من رقمها القياسى وده بيحصل طبعا فى ظل التوجهات الرشيدة ومجهود المخلصين زى ممدوح اسماعيل عضو مجلس الشورى بالتعيين والعضو القيادى فى الحزب الوطنى الديموقراطى وااللى قرر ما يحرمناش من الانجاز الاسطورى ده ويخش بينا التاريخ بعبارته الاسطورية " السلام 98" ممدوح قعد 36 سنة بحالهم بيشتغل بضمير وبيحرم العبارة من اى تطوير واى تجديد عشان تقدر تنفذ طموحنا وتنجح فى الغرق فى عرض البحر اللى احمر من دم اهالينا الغلابة وتموت اكتر من الف وميت بنى ادم وتشرد الاف الاسر ...المهم انه اختار الضحايا كويس قوى ..غلابة من اللى اشتغلوا لحد ما انطحنوا فى السعودية والخليج والكفيل مص دمهم وخلاص ما عدش فيهم رجا ولوحة الشطرنج مش محتاجة لهم محتاجة بتوع المسيرة الحمرا اكتر ....من الاخر مش ناقصة صعايدة بجلاليب معفنة وريحة وحشة .....وتدرس كل الجهات المسئولة حاليا كيفية تكريم صاحب العبارة المعجزة ومكافئته على الانجاز الكبير ده ويفكر البعض فى اطلاق اسمه على اكبر شارع فى الصعيد او ضمه للفريق القومى لكرة القدم وضم اسمه لكشوف المكافات الاسطورية بعد كاس افريقيا اما البحث عن المجرم الحقيقى فكل الاصابع "الوسطى بالذات " تشير الى المعتوه اللى نفذ جريمة بنى مزار !!!والميت لسه بتلات تلاف والمصاب بالف ونص والحسابة بتحسب !! ....المسيرة دى اللى هى سودة بلون الموت ركب عليها ناس كتير برضه اللى خايفين ع الكراسى واللى غاوين منظره وناقصين وجاهه لكن للاسف الشديد بينسحبوا واحد ورا التانى وما بيفضلش جواها غير اهالى الضحايا والمصابين الغلابة اللى منظرهم يقطع قلب اى كافر مش عبيط ...وبرضه ما وصلتش للاجابة على السؤال !!!

اول القول

لو ما عرفتش تضحك
ما تدمعش.. ولا تبكيش..

وان مافضلش معاك غير قلبك

اوعى تخاف

مش ح تموت.. ح تعيش..

وان سألوك الناس عن ضى

جوة عيونك مابيلمعش

ماتخبيش..

قولهم العيب مش فيا

ده العيب فى الضى

وانا مش عاشق ضلمة

ولا زعلت الضى..

مسير الضى لوحده ح يلمع..

مسير الضحك لوحده ح يطلع..

مابيجرحش

ولا يئذيش..

-1-

طقوس العشق ..........يدبدبون على صدرى بالأحذية الثقيلة .....تستدعى دبدباتهم بداخلى اساطير الحزن التى مللتها ...اكررها معهم منتشيا كعادتى ...احاول التلهى فلا استطيع من هول صدمتى .

-2-

ترانيم التصوف.... كثيرة هى الشروخ فى صدرى ....الزلالزل تنبىء بنوبات التغيير الاسطورية الخيالية بداخلى ...اهيم معها غير عابىء بقدرتى على مواصلة التصدع .

-3-

متون الصبر ....قطار بطىء لا يعمل محركه ...يقف فى محطات اليأس ويأبى التحرك ....ينتهى بى المطاف لدفعه فى كل محطة ...خارت قوى الدفع ولازلت فى انتظار المدد .

-4-

شعائر التجلى ....وحيدا تشاغلنى النجوم ....تصطف فى اشكال متباينة كى لا اجيد التعرف عليها ...يوم خذلتنى الاقدار وصرت منكسا للرأس اختفت النجوم ولم تظهر .

-5-

قرابين الفناء ....انتهى رويدا رويدا ...........................